കൊച്ചി: താരസംഘടന അമ്മയിലെ പൊട്ടിത്തെറിയിൽ കൂടുതൽ തുറന്നു പറച്ചിലിനൊരുങ്ങി ശ്വേത മേനോൻ. ഈ മാസം 26ന് ശ്വേത മേനോനും ലക്ഷ്മിപ്രിയയും ഉൾപ്പെടെയുള്ളവർ മാധ്യമങ്ങളെ കാണും. അഡ്ഹോക്ക് കമ്മറ്റി പ്രവർത്തനം തുടങ്ങും മുൻപ് കൂടുതൽ വെളിപ്പെടുത്തലിന് സാധ്യതയുണ്ടെന്നാണ് വിവരം. കഴിഞ്ഞ ദിവസം അമ്മയില് നിന്നും മുതിര്ന്ന നടി മല്ലിക സുകുമാരന് രാജി വെച്ചിരുന്നു. സോഷ്യല് മീഡിയയിലൂടെയാണ് മല്ലിക സുകുമാരന് രാജി അറിയിച്ചത്.
താന് ശ്വേതയ്ക്കൊപ്പമാണെന്ന് അറിയിച്ചു കൊണ്ടാണ് മല്ലിക സുകുമാരന് സംഘടനയില് നിന്നും ഇറങ്ങിപ്പോയത്. ‘സ്നേഹപൂര്വം പടിയിറങ്ങുന്നു അമ്മയില് നിന്നും. സത്യത്തിനൊപ്പം..ന്യായത്തിനൊപ്പം…ശ്വേതയ്ക്കൊപ്പം’ എന്നാണ് മല്ലിക സുകുമാരന് കുറിച്ചിരിക്കുന്നത്. കഴിഞ്ഞ ദിവസം ജനറല് ബോഡി യോഗത്തിന് ശേഷം മാധ്യമങ്ങളെ കണ്ടപ്പോഴും മല്ലിക സുകുമാരന് ശ്വേത മേനോനെ പിന്തുണച്ചിരുന്നു. ശ്വേത മേനോന് അല്ല രാജി വെക്കേണ്ടിയിരുന്നത്. ജനറല് സെക്രട്ടറിയും ട്രഷററുമാണ് രാജി വെക്കേണ്ടിയിരുന്നത് എന്നാണ് മല്ലിക സുകുമാരന് പറഞ്ഞത്. പിന്നാലെയാണ് മല്ലിക സുകുമാരന് താന് സംഘടനയില് നിന്ന് തന്നെ രാജി വെച്ചതായി അറിയിക്കുന്നത്.
