കുവൈത്ത് സിറ്റി: കുവൈത്തിൽ ജീവകാരുണ്യ പ്രവർത്തനങ്ങളുടെ പേരിൽ സാധനങ്ങൾ ശേഖരിച്ച് വിൽപ്പന നടത്തിയ അഞ്ചംഗ സംഘം അറസ്റ്റിൽ. മൂന്ന് സിറിയൻ പൗരന്മാരും രണ്ട് ഈജിപ്ഷ്യൻ പൗരന്മാരുമാണ് പിടിയിലായത്.
ഒരു ചാരിറ്റി സംഘടനയുടെ പേരും സംഭാവനാ പദ്ധതിക്കായി ഉപയോഗിച്ചിരുന്ന വെബ്സൈറ്റും ഫോൺ നമ്പറും ദുരുപയോഗം ചെയ്തായിരുന്നു തട്ടിപ്പ് നടത്തിയതെന്നാണ് അധികൃതരുടെ കണ്ടെത്തൽ. സംഘടനയുടെ അറിവില്ലാതെയാണ് ഇവർ ഈ സംവിധാനങ്ങൾ ഉപയോഗിച്ചതെന്നും അന്വേഷണത്തിൽ വ്യക്തമായി.
വസ്ത്രങ്ങൾ, ഇലക്ട്രോണിക് ഉപകരണങ്ങൾ, ഫർണിച്ചർ, ഭക്ഷ്യവസ്തുക്കൾ തുടങ്ങിയ സാധനങ്ങളാണ് പ്രതികൾ ജനങ്ങളിൽ നിന്ന് സംഭാവനയായി ശേഖരിച്ചത്. ജീവകാരുണ്യ ആവശ്യങ്ങൾക്കായി നൽകുന്നുവെന്ന് വിശ്വസിപ്പിച്ചായിരുന്നു സാധനങ്ങൾ കൈപ്പറ്റിയത്.
ശേഖരിച്ച വസ്തുക്കൾ പിന്നീട് പ്രാദേശിക വിപണികളിൽ വിൽക്കുകയോ വിദേശത്തേക്ക് കയറ്റി അയക്കുകയോ ചെയ്തതായി കുവൈത്ത് ആഭ്യന്തര മന്ത്രാലയം അറിയിച്ചു. ഇതിലൂടെ സംഘത്തിന് പ്രതിമാസം ഏകദേശം 60,000 കുവൈത്ത് ദിനാർ വരെ വരുമാനം ലഭിച്ചിരുന്നതായും അന്വേഷണത്തിൽ കണ്ടെത്തിയിട്ടുണ്ട്.
ജാഹ്റ ഗവർണറേറ്റ് ക്രിമിനൽ ഇൻവെസ്റ്റിഗേഷൻ വിഭാഗമാണ് സംഭവത്തിൽ അന്വേഷണം നടത്തിയത്. അന്വേഷണത്തിന്റെ ഭാഗമായി ആംഘർ പ്രദേശത്തെ ഒരു ഗോഡൗൺ കണ്ടെത്തുകയും അവിടെ സൂക്ഷിച്ചിരുന്ന വിവിധ സാധനങ്ങൾ അധികൃതർ പിടിച്ചെടുക്കുകയും ചെയ്തു.
സംഭാവന ശേഖരണത്തിനായി പ്രതികൾ വിവിധ ആളുകളെയും പ്രതിനിധികളെയും ഉപയോഗിച്ചിരുന്നതായും അധികൃതർ കണ്ടെത്തിയിട്ടുണ്ട്. ശേഖരിച്ച സാധനങ്ങളുടെ ഉറവിടവും അവ പിന്നീട് എവിടേക്കാണ് മാറ്റിയതെന്നും ഉൾപ്പെടെയുള്ള കാര്യങ്ങളിൽ അന്വേഷണം തുടരുകയാണ്.
ജീവകാരുണ്യ പ്രവർത്തനങ്ങൾക്കായി നൽകുന്ന സാധനങ്ങൾ ദുരുപയോഗം ചെയ്യപ്പെട്ട സംഭവത്തിൽ നിയമനടപടികൾ ശക്തമാക്കുമെന്ന് അധികൃതർ വ്യക്തമാക്കി. അറസ്റ്റിലായവർക്കെതിരായ തുടർ നിയമനടപടികൾ പൂർത്തിയാക്കിയതായും ആഭ്യന്തര മന്ത്രാലയം അറിയിച്ചു.
ചാരിറ്റി പ്രവർത്തനങ്ങളുടെ പേരിൽ ജനങ്ങളുടെ വിശ്വാസം മുതലെടുത്ത് സാമ്പത്തിക നേട്ടമുണ്ടാക്കുന്ന രീതിയാണ് അന്വേഷണത്തിൽ പുറത്തുവന്നിരിക്കുന്നത്.
