സീക്വൽ സിനിമകളോട് പൊതുവെ താൽപര്യമില്ലെങ്കിലും ‘ജയിലർ 2’ ചെയ്യാൻ തീരുമാനിച്ചതിന്റെ കാരണം വെളിപ്പെടുത്തി സൂപ്പർസ്റ്റാർ രജനികാന്ത്. ‘ബാഷ 2’, ‘പേട്ട 2’ എന്നീ ചിത്രങ്ങളുടെ രണ്ടാം ഭാഗങ്ങൾ ചെയ്യാനുള്ള അവസരം ലഭിച്ചിട്ടും താൻ അത് നിരസിച്ചതായും താരം വ്യക്തമാക്കി.
സാധാരണയായി ആദ്യഭാഗത്തിന്റെ വിജയത്തെ ആശ്രയിച്ച് അതേ കഥയിൽ കൂടുതൽ ചേരുവകൾ ചേർത്ത് രണ്ടാം ഭാഗം ഒരുക്കുന്ന രീതിയോട് തനിക്ക് താൽപര്യമില്ലെന്നാണ് രജനികാന്തിന്റെ നിലപാട്. ‘ബാഷ 2’ ചെയ്യാനുള്ള നിർദേശം ലഭിച്ചിരുന്നു. സംവിധായകൻ കാർത്തിക് സുബ്ബരാജ് ‘പേട്ട 2’ എന്ന ആശയവുമായി സമീപിച്ചിരുന്നതായും അദ്ദേഹം പറഞ്ഞു. എന്നാൽ, ഈ രണ്ട് പ്രോജക്ടുകളോടും തനിക്ക് താൽപര്യമുണ്ടായിരുന്നില്ല.
പിന്നീട് ‘ജയിലർ’ ഒടിടിയിൽ റിലീസ് ചെയ്തശേഷം വീണ്ടും കണ്ടപ്പോഴാണ് രണ്ടാം ഭാഗത്തിനുള്ള സാധ്യത രജനികാന്തിന് വ്യക്തമായത്. ചിത്രത്തിലെ വർമ്മ എന്ന കഥാപാത്രവുമായി ബന്ധപ്പെട്ട സംഭവങ്ങൾക്കും അതിന് പിന്നിലെ വലിയ ശൃംഖലയ്ക്കും തുടർകഥയ്ക്ക് സാധ്യതയുണ്ടെന്ന് താരം വിലയിരുത്തി. ഇതാണ് ‘ജയിലർ 2’ ചെയ്യാൻ സമ്മതിച്ചതിന് പ്രധാന കാരണമായത്.
നെൽസൺ ദിലീപ്കുമാർ സംവിധാനം ചെയ്യുന്ന ചിത്രത്തിൽ രജനികാന്തിനൊപ്പം മലയാളത്തിന്റെ മോഹൻലാലും പ്രധാന ആകർഷണമാണ്. ചിത്രത്തിൽ മോഹൻലാലിന്റെ കഥാപാത്രത്തെക്കുറിച്ചുള്ള വിവരങ്ങൾക്കായി മലയാളി പ്രേക്ഷകരും കാത്തിരിക്കുകയാണ്.
സൺ പിക്ചേഴ്സിന്റെ ബാനറിൽ കലാനിധി മാരനാണ് ചിത്രം നിർമിക്കുന്നത്. കേരളത്തിൽ ശ്രീ ഗോകുലം മൂവീസാണ് വിതരണം ചെയ്യുന്നത്. ആദ്യ ചിത്രത്തിന്റെ വിജയത്തിനു പിന്നാലെ രണ്ടാം ഭാഗത്തെക്കുറിച്ചുള്ള പ്രതീക്ഷകളും ഉയർന്നിട്ടുണ്ട്.
സീക്വലുകൾ ഒഴിവാക്കാൻ താൽപര്യപ്പെട്ടിരുന്ന രജനികാന്തിനെ ‘ജയിലർ 2’യിലേക്ക് എത്തിച്ചത് കഥയുടെ തുടർച്ചയ്ക്കുള്ള സാധ്യതയാണെന്ന താരത്തിന്റെ വെളിപ്പെടുത്തൽ സിനിമാപ്രേമികൾക്കിടയിൽ ശ്രദ്ധ നേടുകയാണ്.
